喜泰味

Open Now

Now Closed

因為寫得太多負皮，做人不能太mean，而呢間泰菜又真係好食，於是掘翻係8月（即係四個月前）嘅記憶，表達下我對呢餐飯嘅驚艷與喜愛，並證明我唔是一個只會負皮的人。（成日都唔記得影相，以下都係齋噏）晚餐，我同一個女仔朋友叫咗二人套餐，一菜一主餸：泰式炒通菜，青咖喱，送兩杯嘢飲，一碟脆蝦片前菜（應該無啦，唔太記得鳥）。有個雜錦川燒（牛、羊、豬、雞，可能無其中一樣），唔肯定係跟餐送定另外叫，應該係送嘅。蝦片好食，唔係明輝蝦片，係真蝦味脆片，硬硬地嗰種脆。通菜好有鑊氣，入味，加上我鍾意食通菜，呢碟基本我食晒（因為嗰下先知，原來朋友唔鍾意食菜，覺得苦，但見佢都食咗好幾條）。未去過泰國，唔知正宗青咖喱係點，但呢兜牛肉清咖喱好大盤，見到唔同香料，最記得一舊好似迷你番茄咁嘅類茄子物體，食落怪怪的。但咖喱味好香，辣辣地，入味得來唔會太鹹、太甜。我諗最驚豔係，唔似平時食開嘅泰國餐廳咁，有d公式味，真係幾家常。