七福神和食亭

Open Now

Now Closed

今日我去咗佐敦樓上一間日本餐廳，超級抵食，食個好滿足！我同朋友叫咗個二人餐，先嚟蜆肉味噌湯，蜆肉好大粒，令味噌湯更加鮮甜。之後係刺身三品盛合，有帶子、三文魚同甘蝦，刺身厚切又肥美，特別係三文魚，油脂感充足。另外叫咗左口魚，同樣鮮味。香菇野菜炒，加咗木魚同洋蔥，炒得好香，而且份量好大。和風碳燒漢堡扒，漢堡好厚好大塊，肉味香濃，食到真係好滿足。香川鹽燒鯖魚係另一個亮點，魚肉厚實，魚皮燒至焦香，而且本身有少少鹽調味，加埋檸檬就已經好惹味。和風珍味拼盤，有我好鍾意食嘅中華沙律同螺肉。石鍋香蒜牛肉飯，香氣撲鼻嘅蒜同和牛，當然唔少得飯焦。雖然二人餐好豐富，但係我哋太肚餓，口痕叫咗西京燒鰻魚串，好大條嘅鰻魚，上菜嘅時候大家都驚嘆～鰻魚肉質彈牙，醬汁甜甜地，魚皮燒到小小脆，非常出色。牛舌，既厚身又惹味，用咗黑同椒鹽調味，彈牙嘅口感令人回味。最後，我叫咗柚子生忌廉吉士芭菲，甜得清清地唔會太膩，簡直係完美結束。朋友叫咗鮮忌廉綠茶，鮮忌廉嘅味道好特別，撈埋綠茶飲出奇地夾。