翠華餐廳 (Closed)

我知翠華有好多fans，而且佢哋都越做越成功，單睇中環啲分店開得咁密就知，但本蟲就真係唔係咁欣賞。好似今次心血來潮嚟依度食下午茶，啲套餐真係唔係咁吸引，我搵云個餐牌竟然連最大路嗰啲雞脾呀、薯條呀、咖哩角之類都一概搵唔到。不過當問個侍應時佢又話梗係有，咁我叫佢指出嚟喺餐牌邊度有寫，佢最後竟然指住沙律類，話雞翼沙律原來可以改做雞翼薯條，而且價錢仲平啲，真係估佢唔到。講返啲嘢食，雞翼薯條嘅份量好少，薯條都唔知有冇十條，而且唔係一般港式嗰隻，而係懶高級嗰隻美式粗薯條，雞翼雖然有四隻，但係係最細嗰種，而且有雪氣味，最攞命係唔包飲品，另叫檸樂五十蚊都落唔到樓，心諗早知過去美心大家樂，分分鐘食到三個下午茶餐。至於服務都算係翠華最港式嘅一環，是關都係嗰種高效率但無笑容嘅典型侍應咀臉。由於一份餐食唔飽，我唯有加多份西多士補飛，但西多士裡面竟然冇花生醬，真係唔知翠華點解可以叫自己做最港式嘅茶餐廳，在我眼中似係呃鬼佬多啲。