新深粥店

Open Now

Now Closed

呢個星期出咗兩次灣仔，兩日都順便食埋個早餐，一日食豆漿加炒麵，承惠$23；另一日叫咗碗艇仔豬紅粥（相片係兩張，一張係嚟到時拍，另一張係我撈底將材料翻上嚟拍），承惠$26。記得上次食嘅炸兩質素一般，最大問題係凍，油炸鬼唔夠脆，但我認識有人唔喜歡食脆炸兩，而係喜歡食腍身嘅炸兩，不過我相信呢類人係少數。呢次叫嘅炒麵，$15，絕對有驚喜，煙煙韌韌，即国內或台灣人所講嘅Q彈，好好食。咁當然，同我食過最好食嘅豉油王炒麵仲有距離（我食過最好食嘅係起溫哥華嘅唐人區酒樓，而且已經廿幾年前嘅事，間酒樓起唔起度都未知，我亦唔記得個酒樓名，想去到食返都難），但絕對係水準之上。豆漿，夠凍🥶，雖然無驚喜，但水準絕對合格，$8一杯，仲起條咁旺嘅軒尼斯道，唔會畀杯稀水你，起咁熱嘅天氣，絕對係超正👍。豬紅艇仔粥有碎牛、豬皮、水魷、豬紅、炸花生及蔥花，味道一般，無咩驚喜。廿零蚊個早餐，今時今日，仲要係市區旺地堂食，絕對係抵，如果畀你揀，你又會點揀？