冬蔭公公 (Closed)

新城市不嬲都難搵食，好彩連城廣場呢到唔係太多人，都唔係太難搵位。落單方法方便快捷，好似飲茶D點心紙咁自己TICK。我地3個人叫左2個麵，一個小食拼盤同半份木瓜沙律。首先到既係個小食拼盤配既2杯飲品。下面見到既係黑珍珠椰汁冰同埋鹹青檸梳打。2杯野飲當中我PREFER鹹青檸梳打，味道青D同埋無咁甜。下面呢個係冬蔭湯米線，辣度有分BB辣中辣同大辣，今日揀既係BB辣，味道OK，唔算太辣太淡，但下次可以試中辣，配埋米線味道唔錯。唯一美中不足既就係D配料要續樣加錢，唔多化算。之後到既係鮮魚湯幼薯粉配炸魚皮，炸魚皮係分開上既，鮮魚湯底夠魚味，不過同冬蔭湯米線真係無得比。個小食拼盤就正啦，又串燒又肉又蝦又春卷，我本人最鍾意既都係串燒同蝦。本身佢都有D汁配既，但係D肉已經夠味，唔點醬都OK。最後到既係木瓜沙律，呢個有少少失望，得個辣字，其他咩味都食唔到。