有情有意 (Closed)

為食豬買咗呢間社企餐廳嘅任食團購，本來對呢度嘅食物冇抱特別期望，結果令為食豬都幾滿意。任食選擇唔算好多，但由沙律、小食、主菜、甜品等等都各有幾款可以揀。先黎食啲沙律先。我哋分別叫咗燒雞肉田園沙律同凱撒沙律。燒雞肉沙律嘅燒雞好香好惹味，黑醋汁略為濃味同甜，係一道比較重口味嘅沙律。只有菜，麵包粒，芝士粉同煙肉乾粒嘅凱撒沙律就相對清爽，為食豬一致認為如果將燒雞肉加入凱撒沙律一定。是日餐湯係雜菌湯，雜菌用料十足，成個湯都充滿濃郁菌味，為食豬話好啱鍾意菇菌類嘅佢。懷住不安嘅心情都點咗魚生同壽司試下。我哋每款都試過，結論係魚生唔算新鮮，有啲腥，可以不試。亦試咗兩款火焰醋飯卷，其中帶子果款嘅帶子幾好味，但兩款飯卷都太大舊而且個飯煮得太爛。煙三文魚慕絲胡麻醬豆腐都幾清新，唔太食到煙三文魚慕絲味，豆腐好滑。麻醬冷麵意想不到嘅唔錯，比起出面放題嘅可能更好味，用料有心思，竟然有日式腐皮。呢個卡邦尼為食豬覺得值得推介，比起外面好多餐廳同cafe做得好，忌廉香濃而且有蛋黃香味，美中不足係配料俾得少。黑松露野菌意大利飯亦唔錯，松露味尚算濃郁，亦有唔少野菌。鮮蝦墨汁意大利飯就一般，蝦係爽口嘅但墨汁意大利飯冇咩味道。