鳴虎 (北帝街) (Closed)

假期去咗土瓜灣探親戚，去之前上咗Open Rice睇下有咩日本野食。比我發現咗呢間新開既拉麵店，就膽粗粗去試下！一入到去間鋪，待應就好好禮咁安排咗我地既坐位。而環境就感覺乾淨整理，第一印象不錯不錯。我叫咗佢地主打既 “黑鳴虎”，而我媽媽就叫咗 “綠虎”。正常份量既拉麵應該就唔會太飽既，所以我地加咗兩份小食，一份 “鳴虎炸雞” 同一份 “鳴虎炸蝦仔”。“黑鳴虎”湯底係由黑蒜油、墨魚汁同豬骨湯組成。湯底唔算太濃，配埋拉麵食就啱啱好。黑蒜油既味同墨魚汁既味唔會搶咗大家既味，食到淡淡既黑蒜油同墨魚汁味，相輔相成！叉燒同麵底有日本水準。“綠虎”既湯底係芫荽豬骨味，鍾意既朋友就會好鍾意，你明白的，香港唔係太多地方可以食到芫荽味既拉麵，配埋豬骨，鍾意食芫荽既你一定要bookmark呢一間拉麵店！“鳴虎炸雞” 外脆內嫩，入口d汁爆曬出嚟！好正！ 而 “鳴虎炸蝦仔” 炸得幾脆，蝦頭脆到可以食埋！份量都幾多，落埋檸檬汁就唔會覺得太油膩！