龍鳳號 (Closed)

呢間鋪裝潢幾有特色，外表似係食中國菜既餐廳，點知原來係食台灣野。唔想食得咁熱氣，決定試下呢間。一行4人，叫左魯肉飯、肉燥飯、肉燥拌米粉、鹽酥菇、滷水拼盤、醬燒茄子、麻薯地瓜棒。魯肉飯同肉燥飯相比，我地都鍾意肉燥飯多啲，肉燥飯比較無咁多肥肉，而魯肉飯上面啲肉粒就硬啲。肉燥拌米粉啲米粉好幼，如果多啲肉燥就更好。麻薯地瓜棒要趁熱食，甜甜地咁，外面好脆，裡面好煙韌，但唔係好食到地瓜味。好鍾意呢碟醬燒茄子，茄子偏硬身，加埋茄子上面啲醬好match 👍🏻 滷水拼盤就麻麻地，滷水蛋都正常，滷水豆腐口感比較硬同乾，仲有啲苦澀味，滷水豬耳太大舊，滷水味唔夠入味。鹽酥菇都唔錯，只係食到底嗰幾粒好多油。佢有好多唔同飲料，我叫左熱四季春，好大杯。之後叫左2個甜品share食，翡翠愛玉冰同埋綠豆湯。翡翠愛玉冰加左一小片青檸，少少酸加上愛玉既甜同埋冰碎，好消暑。綠豆湯入面有埋芋圓、地瓜圓，如果少啲甜就更好。4個人食，total $515，每人都係百零蚊，仲食埋台式甜品添，幾抵食。呢間餐廳大部分野食都唔錯，下次可以試多啲其他野食，值得encore!