鬼金棒

Open Now

Now Closed

星期五晚又係周圍搵好野食嘅Best timing，今次同朋友揀左呢間日式拉麵店鬼金棒，聽個名都feel到會係重口味嘅拉麵。我地一行二人，好快就搵到座位，店內環境同一般拉麵店差唔多，都係長長窄窄咁，個子高大嘅朋友或者會坐得無咁舒服；另外，有一點令我失望嘅係：店內無籃子提供，我地嘅隨身物品又唔可以放喺自己張凳(無凳pan)同隔離凳(有其他食客)，所以只可以放落地下，成件事都幾污糟......如果佢可以參考其他食店咁：要人搭枱嘅同時亦能夠提供足夠嘅儲物空間俾食客，咁客人嘅感觀一定好好多，唔使食得咁辛苦。食物方面，我嗌左一份味玉辣麻味噌拉麵，拉麵無得揀軟硬度，份量充足，叉燒夠入味；配菜有溫泉蛋(味玉)、玉米筍、豆芽菜等等。整體嚟講，湯底偏油偏咸，麻味已經揀左中麻但略感不足，可能俾辣味遮蓋左；最令人驚喜嘅係味玉，顏色鮮紅，蛋味超濃郁，值得一試！缺點嚟講：價錢偏貴($100)，外面有唔少高質拉麵店都做緊兩位數價錢嘅反襯之下，更顯得呢間拉麵店性價比低。