緣聚 (Moved) New Location

勞動節翌日，同四個fd特登約出黎食野，原本係想試附近間韓國料理，點知冇位然後就發現左對面嘅呢間西日放題，裏面大把位，仲要午市只係八十八蚊起，所以我地就轉軚食放題點知入到去先知伏左，原來八十八蚊淨係包壽司、卷物/手卷、前菜/沙律、天婦羅/揚物同食事，仲要加一服務費（其實餐牌有寫，但係我地一見到八十八蚊就急不及待入左去）我地就冇要全包，淨係每人加多五蚊升級飲品。第一輪慣性地叫勁多野食，叫左好多壽司，之後就開始後悔食放題其實根本唔應該食太多壽司，所以之後都冇再叫。印象比較深刻嘅野食係流心朱古力棒棒串，個賣相雖然唔係太吸引，但個味道就真係好掂有少少似心太軟，不過就係一串串咁，幾新奇有趣。蟹籽沙律比起刺身沙律好食，d沙律醬比得幾足相反刺身沙律就比得勁少，個人認為呢d食唔飽又好食，所以我地一共叫左十一客仲有一個叫芝心片嘅野都好正，塊野入面d芝士好似拉唔盡咁，個感覺幾有趣。但係有一個叫忌廉蟹肉薯餅嘅野就真係麻麻地，有少少奇怪。雖然選擇少，但係食到好飽，可能係d野食飽肚啦，一百蚊左右嘅質素其實都算係咁，個人認為冇咩特別，所以就冇一種食過番尋味嘅感覺喇。