喬木

Open Now

Now Closed

今日難得平日同埋老公一齊放假，好想食日本野。一心諗住碰吓運氣，未必有位。點知去到問如果冇book 位walk-in 得唔得，有個女侍應好nice 出嚟招呼，話當然冇問題，原來今日1 點左右得1 枱客。坐低之後，即刻放低2 杯熱茶，女侍應見到我地好熱，即刻問我哋要唔要2 杯冰茶，非常細心！冰茶麥味香濃，簡直透心涼。之後放低碟支豆，小小鹽喺面，食完一條又一條。我哋叫咗滑蛋咖喱吉列海老定食同壽喜汁燒安格斯牛肉定食。小食嘅蛋餅、醃製牛蒡、鰻魚、沙律非常新鮮，茶碗蒸有好香嘅黑松露係底，但一啲都冇搶到蛋味，加上有小貝柱溶係蛋面，加強口感，非常驚喜，相信其他舖頭好難食到。味噌湯有件雞肉，唔太咸，唔錯。烏冬麵好滑，炸蝦嘅炸粉恰到好處，咖喱汁唔辣，不過我見唔到邊度有滑蛋。安格斯牛肉鬆軟，撈埋生蛋真係好juicy !最後芝麻奶凍甜品都有驚喜！整體每樣少少份量超級飽！其實Menu選擇都幾多，職員又殷勤，仲冇加一，店舖木製裝修，不斷播住relax 音樂，好舒服。相信好快會再嚟食過，支持用心小店。臨走見到有兒童餐同bb 櫈，下次帶埋呀女嚟！