大喜屋 (Closed)

難得今日同同事一齊收工，梗係去銅鑼灣大喜屋食放題啦，好耐冇食啦！入到去，原來呢都冇乜人食，所以環境幾寧靜，好適合傾計。一開始梗係嗌魚生先呀，首先試咗三文魚，入口即溶，又凍又新鮮，繼續狂encore。之後就是紋甲魷魚，事關本人真係好鍾意食魷魚，佢呢隻魷魚雖然一條條好細條，但係真係好煙韌，嗌左好多條之後梗係試食海膽手卷啦，啲飯又小，海膽又新鮮，冇腥味入口即溶。之後就係海膽拖羅魚生塔，海膽甜蝦壽司，鵝肝伴帶子，細細粒嘅花之戀，同埋黑松露油金魚，呢個配搭真係好特別，黑松露醬係畫龍點睛。跟住就係食炙燒芝士玉子，同埋大喜黃金蟹棒燒，呢兩件都勁大件勁抵夾埋啲芝士真係一流。呢一疊係我成間餐廳最鍾意食嘅嘢，就係燒三文魚壽司，同埋海鹽燒左口魚邊壽司啦！兩舊都入口即溶，燒到溶左落d飯度，仲有好香既炭燒味！天婦羅都係重點項目之一，炸得好脆，矮瓜南瓜簡直係超好味唔使講個炸蝦啦，一流。每次放題必食的芝士年糕。最後甜品項目，有牛乳拉動，焦糖布甸， Tiramisu，伯爵朱古力杯，全部都不過不失。