升哥點心 (Closed)

本來諗住晏晝冇咩地方可以食點心，因為通常人哋飲茶都係朝頭早飲嘅。但元朗哩一間升哥點心就唔同。去到下午茶都有點心提供，仲有優惠。咁就同朋友行過試吓啦，點知呢度啲點心的確唔錯有驚喜。一開始就叫咗兩個湯黎飲補番下先，第一個係蟲草花淮山杞子燉雞腳。呢個湯清清淡淡咁，殊不知都幾足料。但係枱面上面有少少油，建議大家可以整走佢先來飲。二另外一個五指毛桃燉豬展都幾有益！原來餐廳會每隔10日就轉湯品既選擇。下次嚟希望可以試吓其他唔同嘅靚湯。講返點心，食點心又點少得燒賣呀。呢個原隻蝦燒賣我一舊上邊都有一大隻蝦喺度，蝦肉嘅蝦味好足好新鮮。搞到成粒燒賣口感同味道都提升唔少。👍另外想特別推介嘅係呢一個蒜香脆脆蝦餃王，呢個點心好特別喺其他餐廳搵唔到。雖然一隻要$12有少少貴但係建議大家嚟食嘅話一定要試吓呢一個蝦餃王。一咬落去蒜香四溢，再配埋餐廳淋上嘅獨有醬汁好味！ 我哋仲叫咗蜜汁叉燒腸粉，叉燒腸入邊嘅叉燒爆多！叉燒燒到恰到好處唔會燒得太窿，餐廳係處理醬汁方面的確唔錯。呢個叉燒腸粉都係水準之上啊！除咗食物質素好之外，員工亦都好有善！照顧客人周到！我諗下次都會帶其他朋友嚟再試下！