金鶴拉麵 (荷李活道) (Closed)

全清，係全清， 湯都清哂。呢間金鶴拉麵我一早聽過人地話好食。今次終於有機會食到，極推介。一入到黎，店員幫我地量體溫，安排左一個舒適既角落俾我地坐。後來上番佢地fb專頁，原來佢地係想俾一個舒服既環境客人食拉麵，改變傳統速食拉麵既文化，咁佢又真係做到呢點。我地叫左一碗雞白湯沾麵，餸有3個選擇，我地揀左一件叉燒，2件雞胸肉。最出名既雞白湯用黎做沾麵果然係正！真係冇令我地失望，不枉我地專誠黎到。過左冷河既拉麵好爽身，點落又熱又濃既雞白湯入面放入口，即時令個口腔以至喉嚨都係呢浸雞湯味。叉燒同慢煮既雞胸肉都好嫰滑爽口，極推介！另一碗叫左今期先有既京都抹茶雞白湯拉麵。抹茶既味道同濃濃既雞白湯好夾，加埋鮮甜既蟹肉，成個湯就係香濃肉味加好鮮甜既海鮮味。最後當然兩碗都係連一滴湯都飲哂啦下次想試下佢個黑蒜湯拉麵，見到隔離枱食好似好正！