養心殿台式養生鍋 (Closed)

今次既聚會我地揀左「養心殿台式養生鍋」，尖沙咀棉登徑好方便，用木屏風分隔每張枱，非常貼心！朋友上次已經試左「美人鍋」，今次就試「養生鍋」！湯滾起時已聞到好香既藥材味，我未食就先飲左啖湯，飲落好香藥材味，好滋潤好補既感覺，令人驚喜，我平時唔飲湯都飲到停唔到口。佢都有自助醬料區，不過我覺得湯味濃郁，所以完全冇用過醬料。打邊爐當然要食牛，點左份「手切牛肉」，牛味濃且肉質嫩滑，脂肪適中，清晰紋理，牛肉質感同入口味道都屬上乘，大讚，下次要叫大份！「厚脂黑毛豬梅花肉」，豬肉中頂級的部位，脂肪分佈如大理石紋，肉質細嫩，油潤甘香，鬆軟多汁！仲有「豬粉腸」烚熟後煙韌彈牙，「唐生菜」亦新鮮爽脆。不得不提「手工黑松露蝦丸」，好重黑松露味！「自家製鮮蝦雲吞」皮薄餡靚！「鴨血」口感嫩滑，再追加左一份！最後以「新竹米粉」作結，米粉吸收哂湯既鮮味，充滿人參甘香真係不得了，大滿足！