大喬日本料理 (Closed)

原本同女朋友拍拖去銅鑼灣食日本野，點知冇訂位行左兩三間都要等個幾鐘，於是打電話求救，朋友介紹左上去，淨係唔駛等位兼環境舒服已經合我心意。拿起個菜牌發現D價錢上落好大，我前後點左六個野食：龍蝦刺身、雜錦魚生、炸盧旬、芝士焗蠔、酒煮大蜆、烏冬。龍蝦刺身同炸盧旬竟然係差不多價錢，不過佢地話係PROMOTION，所以龍蝦係蝕本價，聽落幾開心，一百蚊隻龍蝦刺身真係邊度搵，上到台面隻野仲狂動，嚇到我老婆跳起，不過證明新鮮都係好事。野食算係水準中上，尤其魚生同龍蝦真係驚喜，我試過去一D貴得多的日本餐廳都係差不多呢個水準，惟一係個蠔配料好味但有少少腥唔算超新鮮，不過我印象中在香港好似未食過真係唔腥的蠔，所以都有心理準備。呢度可能因為人少，招呼相當熱情，最凍反而係D茶。兩個人食左六樣野非常滿足而再睇睇張單就有D高興，可能我在PROMOTION的野食中選左幾樣，加埋都係500蚊，咁叫野食法同去D CHEAP餐龐的價錢冇分別，可能因為冇開酒關係所以咁抵。問題係餐牌上面的鐵板餐一個人成六七百蚊，我唔知有咩人會叫，因為個起落差太遠。不過論環境論野食論價錢，真係值得推介，帶新識的女朋友去食都唔失禮。