雲蝶 (Closed)

經過大圍見到有間好靚而且新開嘅cafe就走入去睇下有咩食，叫咗西班牙墨汁海鮮飯、軟殼蟹黑松露野菌忌廉意粉，另外嗌咗份雲蝶特色薯蓉，係吞拿魚碎蛋味，同埋叫咗一杯香桃果香茶，個西班牙墨汁海鮮飯超香，炒得每一粒飯都沾滿墨汁而且上面鋪滿帶子、魚籽、青口、同埋大蝦，十分豐富，每一啖飯都炒得好香值得推介。而軟殼蟹黑松露野菌忌廉意粉係原隻軟殼蟹上，炸得甘脆可口而且不失入面軟殼蟹嘅鮮味，好好味，意粉加上忌廉同埋野菌食，令到人好開胃，黑松露就可以提升意粉嘅味道多一個層次。特色薯蓉就賣相非常特別，絕對係打卡之選，因為佢會連埋一個雪糕筒上，而蕃蓉嘅味道加埋碎蛋同埋吞拿魚一齊食，估唔到原來咁夾，香桃果香茶就畀人一種暖在心頭嘅感覺，而且果香味好濃，下次有機會呢雲蝶，我一定會試埋其他味嘅特色薯蓉。