麗港軒潮菜館 (Closed)

嚟到呢間潮州菜館，又真係幾得。唔係有friend住呢頭，都唔會識得嚟呢度食飯。鹵水鵝片并豬腸 - 好大碟。鵝片好嫩滑，豬腸夠淋，頌有豆腐墊低，鹵水汁夠晒味，又煮得夠火喉，剛剛好不會過鹹。福果胡椒豬肚湯 - 胡椒味夠，好香濃白果，不過湯渣唔多，豬肚較少。味菜煲大蟮 - 條蟮好大條，好滑好鮮甜，味菜煮得好淋啲味入晒係嗰湯底度，鹹中帶有鮮味，好好食。潮州凍蟹 - 不過不失，蟹比較細，肉不多。食凍蟹主要食鮮味，但鮮味不足稍為遜色。不過價錢咁平都算係交到貨。九肚魚春卷 - 之前未食過想試下，不過其實食唔到九肚魚味，剩係覺得啲「涵」嘅質感似係九肚魚嗰種質地，不過即炸春卷熱辣辣，已經夠好食。豉油王煎蝦 - 中蝦size，鮮味不足似係雪藏蝦，但係嗰汁校得好好，豉油好香又有甜味。潮州芫茜燒鷄 - 鷄都幾滑，但唔覺有芫茜味，所以唔知點解嗰名話芫茜燒鷄。點豉油食就更好味。蠔仔烙 - 好多蠔，蛋香夠，配搭合宜。