韓閣 (富裕樓) (Closed)

今個星期再一次出動食好西。今日就去咗荃灣“韓閣“食韓國菜 ，幾次經過都見到好多人排隊 ，感覺應該會唔錯 。 頭盤呢就可以用超低價嗌兩款小食。我哋就叫咗芝士流心條$12  同埋上湯泡菜餃子$12。 芝士條新鮮熱辣，芝士流曬出嚟 ，非常脆口。餃子就非常之大隻。 充滿著泡菜粉絲等等餡料 ，十分滿足 。 食韓國嘢又點少得韓式飯卷，點咗牛肉雜菜手卷$46,一入口就充滿住好香嘅麻油味 ,口感丰富。 另外我哋仲嗌咗一個 芝士雜錦部隊鍋 $98 ，性價比十分之高 ，有齊曬腸仔午餐肉豬肉牛肉，重點就係嗰一兜芝士 ，非常惹味亦都十分邪惡 。 而且牛肉用過蜜糖去醃製 ，食落充斥住好香嘅花香蜜糖味，感覺幾特別。我哋仲用咗優惠價追加魷魚圈$25， 份量十足，食極都有。 除此之外我哋仲點咗牛骨蘿蔔湯$108， 熱辣辣送上嚟每一啖湯都有滿滿嘅牛肉香味，而且牛骨煮到非常鬆軟 ，口感一流 。 整體嚟講都非常出色 ，不比尖沙咀韓國街嘅韓國餐廳遜色。 順帶一提，覺得荃灣遠嘅朋友，另外都有將軍澳分店選擇。