十十川滬料理 (Closed)

同老公行朗豪坊行到攰攰地，去到美食廣場，見到有間食川滬菜餐廳，好似幾好，所以就揀左佢食晚飯。餐廳雖然食中式，但裝修比較西式，吹簡約風。燈光光猛，環境乾淨整齊，感覺舒服。餐牌都幾多嘢食，老公就點左前菜、小籠包、炒飯、咸點同甜品。雞絲粉皮：老公話份量算多，粉皮煙韌，青瓜爽口，配中式麻醬味道較濃，呢個前菜都幾好食。什錦小籠包：四隻顏色，四款口味。紅色係香辣味，辣辣地；綠色嘅係酸菜魚，味道真係酸菜魚味喎；白色真係原味，鮮肉味重；黃色係金黃流沙，好香鹹蛋黃；各款有創意同特色，出面未食過。十十海鮮炒飯：裡面有蟹柳，墨魚仔同河蝦。河蝦爽口，墨魚仔煙韌口感，炒飯炒到粒粒分明，唔會食到滿口油，加埋雞蛋炒好香，整體唔錯。迷你香脆蔥油餅：入口仲係熱，咬落去外面脆，口感實在，淡淡蔥味，又唔覺得好多油，幾飽肚。酥皮鳳梨奶黃鍋餅：一般食開紅豆味，但呢度用鳳梨奶黃做配料，幾創新，亦估到味道幾好。鳳梨奶黃味重，甜甜地又唔會話好甜，外層脆，裡面軟軟，食埋佢就滿足晒。