利寶閣 (Closed)

星期日做下孝順女，帶呀媽出去奧海城飲茶。通常一碟點心都有4舊，兩個人食又唔食得多款，見利寶閣做緊點心放題就試試佢。點心放題仲會每位送一隻鮑魚酥加花膠灌湯餃，好正正呀！點心放題既點心種類有成60種，基本野蝦餃燒賣都可以叫。另外大排檔小食、粉麵飯同甜品都可以叫㗎。而且點心嘅種類都可以逐碟或者逐隻叫嘅，咁就可以減少浪費，食得晒先好嗌！其實點心就同平時食嗰啲都差唔多，係可以比平時食多啲唔同嘅點心囉。放題送果個原隻鮑魚酥同花膠灌湯餃好正㗎。而我最鍾意就係呢度嘅暗然銷魂飯同燒汁木魚釀茄子。因為夠晒特別其他酒樓都好少會食到。暗然銷魂飯個叉燒雖然好肥，但係好夠味，令到成個飯好出色，加埋隻半熟蛋，撈埋飯食冇得頂！最後就試埋佢唔同嘅甜品，芒果布甸同楊枝甘露都係正路野。唯一有啲失望嘅就係佢個蛋白杏仁茶，唔知點解佢俾我哋平時食開嘅唔同，好似好多油又淡色咁，見到個樣咁都唔敢食。整體來講啲點心都OK嘅，兩個鐘可以慢慢食，又試到唔同嘅點心，食到可以捧住個肚走嘅。