小南國 (Closed)

醉雞肉嫰，份量多，啲酒好香，仲好想食埋啲皮添～春卷夠脆；菜肉餛飩都唔錯，一碗有８隻，抵～小籠包唔夠多湯～生煎包非常好，個底仲好脆添，但因為包與包之間痴得頗實，到夾時焗住扯穿左啲皮睇住啲湯漏～薺菜炒年糕，軟硬度適中，但可能因為我唔係叫雪菜，所以好淡口～一向黎食，到甜品時必叫如意卷，但自從上次黎食，４件變左３件（翻查舊相證明↑），一樣賣$30，即係變相加價～所以轉叫豆沙窩餅，非常好食，驚喜嘅原來內裡有香蕉～上次黎食送$50現金券，上面寫上「不適用於節日及節日前夕」，今日星期日，係公眾假期啫，唔會當係節日卦？所以今次打算用左佢，埋單時將現金券同信用咭同時遞俾個侍應，侍應去到cashier後再返轉頭俾番張現金券我話「星期一至五至用得」，我唔服，同佢講「張券都無寫到只限星期一至五用？！」，佢話「上次俾妳時我地有講星期一至五至用得」，咁你講乜都得啦，咁重要嘅條款都唔寫落去，（心諗你不如講話「星期日＝節日」，我都可以啃左佢），講講吓佢話咁搵經理同我講，我話唔洗喇，心諗經理都係affirm佢講嘅野再加句「唔好意思」啫，最重要嘅係逢親呢類券一定有寫發券者「有最終決定權」，所以都係慳番啖氣