生記粉麵

Open Now

Now Closed

生記粉麵都開店好一段時間，道聽途說是之前路徳圍雄記新店。之前雄記食過一次，體驗極差，出品差又貴，服務也似唔憂做。疫情當中上了報道話老店執笠可惜，我心諗執笠實在合理。但生記始終第二個名，或者無關？主力做幾樣，點了牛𦟌米線加魚肉。下午四點到，一兩枱客，唔洗等。上菜都好快，大致都正常。仲有少少腐皮。牛𦟌四塊大塊，炆得好食，入味入口即化。湯底都有心機，鹹酸辣有層次。佢無話自己邊門邊派，就係做自己味道，幾好。魚肉春卷。有魚味，有蛋香，當然都有粉啦，但比例合理，途中都有人買一兩條走。記得之前雄記都有，但難食又乾又爛都唔知擺咗幾耐，講真有呢個質素又點會執丫？鹹菜，都真係幾鹹，放少少就好。辣醬，重麻辣，惹味，都係有心機。整體而言，出色米線，價錢合理。