好媽媽台灣館 (Closed)

同朋友嚟開呢頭附近做義工，去之前約埋一齊食個lunch。咁啱經過好媽媽台灣館，幾年前小妹同朋友食過次晚飯覺得又平又好食，今次喺門口見到個lunch menu又幾啱食，就信心滿滿咁拉咗朋友入去仲推介佢一定要試下呢間台灣菜😂我地一人叫咗一個lunch set，四十幾蚊一個餐係抵食嘅。滑蛋豬扒飯呢個滑蛋豬扒飯同我地想像中有啲出入，煎得唔錯嘅豬扒，配上水狀好稀嘅蛋碎🤢眼見朋友面有難色，頭先仲大大力推介話好味嘅我唯有率先試啖。好彩味道係正常嘅😂但係蛋水真係賣相唔掂，睇見都🤢🙈香酥骨鹵肉飯本身仲覺得帶咗朋友嚟呢到中伏唔好意思，但當我個午餐一上枱，賣相更差更驚嚇嘅時候，小妹當堂有種鬆一口氣嘅感覺，因為原來我個餐仲伏😂即刻內疚感去去走😂不過奇妙地，賣相恐怖，但味道都唔差。雖然鹵肉珍貴地只有幾粒，但都食得出好入味，而且入口鬆軟得嚟唔油膩。香酥骨炸得老火咗啲，同埋少肉多骨，啱哂鐘意食熱氣嘢，又唔想食咁多肉嘅我😂******************呢到嘅午餐係抵食嘅，味道正常，只係賣相驚嚇，唔係外貌協會嘅朋友想試無妨。