雲魅 (Closed)

平時好鍾意食麻辣米線，差唔多每星期都會食。但湯底另上嘅正宗過橋米線真係第一次食。平日午市套餐只係$78，包括過橋米線、小食同飲品。過橋米線有兩款肉類同兩款湯底揀。湯底就只有雲魅特色湯同蕃茄湯揀，無辣嘅選擇。而肉類可以揀肥牛或者豬腩片。落完單唔使一分鐘就上咗凍柚子蜜，小食同埋米線配料，好有效率。而放喺砂鍋嘅湯底等咗幾分鐘就上枱。過橋米線嘅餸菜配料分為小碟放喺盤上面，望落好豐富，賣相好靚。用砂鍋上嘅湯底非常熱，一放上枱時仲滾緊。襯住湯仲熱就將配料，肥牛同米線放入砂鍋。本身已煮至半熟嘅肥牛放入熱湯後，變成九成熟。肥牛同蕃茄湯好夾，食落唔會韌。蕃茄湯底睇個顏色都知濃郁，係好真嘅蕃茄味米線食落夠滑唔會過腍，但份量少咗啲。午市套餐包埋嘅小食，揀咗手撕雞手撕雞面頭有芫茜碎同辣椒粒，食落好香椒麻味，微辣，幾好味雖然食米線嚟講呢個價錢有少少貴，但勝在賣相靚，而且包埋一個小食同大大杯凍飲。如果想食到正宗雲南過橋米線不妨一試。