鹵八鵝店 (Moved) New Location

前一晚見有食評讚此店，心思思之下今日lunch 就一支公走黎整碟鹵水飯嘆嘆。店內都尚算多人，不過一條友有樣好，就係等位唔駛等多過兩分鐘。坐低速速點了鹵鵝鵝肝飯($25)加例湯($5)，環顧四周，人客係幾多，但係地方係意料之外既乾淨，員工們亦係意料之外有禮貌，感覺良好。例湯係黑胡椒咸菜豬肚湯，係我食咁耐碟頭飯而來做得最不馬虎的了。湯最先要的夠熱佢做到了，黑胡椒湯辣味幾足，加上咸菜豬肚瘦肉煮成既湯十分夠味，單單就價錢來計就係幾飽都要飲番碗。碟頭飯不論料跟白飯都唔惹少，鹵鵝十分入味，而咁岩食正無骨的，啖啖肉過足口癮；鵝肝沒想像既黑媽媽，鹵水味較輕清，正好唔會搶去濃濃既鵝肝味，襯飯一流，美中不足既係切得太薄身，唔夠口感。十分鐘極速處決掉整碟飯，飲埋湯食埋湯料飽到上心口才$30，埋單時己經盤算定下次再黎點咩食了。