太平飯店 (Closed)

朋友生日，地膽帶路食呢間。係北角做左咁耐野，都唔知有間咁嘅餐廳，朋友話係米芝連阿鴻小吃班底開。小妹以前係阿鴻粉絲，自從阿鴻離開北角就冇好潮州菜食，得返和富對面果間，冇咩得揀。朋友訂左位，又訂埋瀨尿蝦同烏頭。另外叫埋溏心蛋、鴨舌、滷水雙拼、糖醋麵同反沙紫薯。 溏心蛋有酒香但冇咩味，個人覺得加少少鹽更好味。鴨舌有三隻味，送啤酒幾好。滷水拼盤叫左鵝片同墨魚，鵝片超滑！仲有最愛嘅底脾肉，賣相同味道都同阿鴻一樣，竟然冇失望喎！ 掛住食，唔記得影全相烏頭有黃油，都好食，但唔特別。同九龍城海老四差唔多，但呢度平啲囉。 瀨尿蝦用椒鹽炒，好惹味！ 雖然細細隻蝦，但都有膏都多肉，幾好！ 特別叫左糖醋麵，一上碟大家就嘩嘩聲，因為竟然用木板上碟，又幾盞鬼。最後叫埋反沙紫薯做甜品，賣相100分，味道70分啦，因為真係太甜，食一舊就夠，但生日朋友竟然成碟食哂，勁！ 請埋朋友食，5個人每人二百蚊都唔洗，超抵啦！