岩盤牛扒 ミディアムレア ステーキ (博文街) (Closed)

老公早前睇到報導，知道有間 “Medium Rare Steak”牛扒店 – 一間可以按照自己食量去落單，而且即切、即磅、即燒嘅扒房！舖頭以自助形式，門口餐牌已列明每款牛肉嘅價錢，而且加$28起配套餐添！揀好就直接喺點餐區排隊落單，店員會因應客人所揀嘅部位同gram數即切即磅牛扒，今次我就揀咗西冷部位 (300g)加配set1 。落完單，店員就會俾個取餐電子牌我哋，然後就可以入去搵位坐低等喇！另外，呢度仲提供即棄圍裙，唔做驚啲牛油會彈到成身都係，好貼心呢！大概等咗十分鐘，當個取餐電子牌響&震動就可以出去取餐！店員先將牛扒煎封至三成熟，以鎖住肉汁，再放上鐵板上，客人可以按自己嘅喜好煎至合適自己嘅生熟程度。塊牛扒真係好足份量，西冷厚身有嚼口，肉味味濃，配上自己所選嘅蒜油，真係絕配！另外，如果嫌唔夠味的話，本身牛扒已附上燒汁，枱上亦有粉紅色岩鹽&黑椒可以自己調味，絕對滿足所有嘅客人。Set 1 就從白飯、溫泉蛋、味噌湯、沙律同飲品中5選3，當中個溫泉蛋非常唔錯，加上醬油同調味倍添風味。成個set埋單唔使$200，而呢個價錢，呢個質素，我覺得絕對超值⋯下次真係要過嚟試埋其他部位！