勝記酒家 (Closed)

平時都係我帶爸爸媽媽去食飯，今天竟然係爸爸提議去一間灣仔的老飯店。原來呢間飯店係當年佢喺灣仔住時已經認識的。肩負起點餐的重任，參考左侍應哥哥同雙親的意見後，點左唔少美食。識食乳豬梗係食自家即燒啦！呢間老字號的兜記乳豬標榜自家即燒，表皮真係十級脆。呢度的食法仲比較特別，同片皮鴨有點相似，墊塊包包中和油膩的口感。唯一美中不足係乳豬皮同肉有點分離，而且切的方向有點唔一樣，唔能夠一下就夾起。我哋一家四口剛剛好可以食一煲雞煲翅。雞煲翅真材實料，每碗都有幾大啖翅，湯係厚厚的濃白色，鮮香濃郁。比較驚喜的是煮完翅的雞毫不遜色，又鮮又滑，一下子就俾我哋食晒。另一個驚喜位置，只係＄38一隻的乳鴿亦成功打動到我哋。乳鴿上枱時配上傳統的惟鹽，實在生色不少。相信乳鴿都係佢哋即燒，因為表皮同樣香脆，而且內裏的肉好嫩，有乳鴿獨特的鮮味。其他菜式整體都唔錯但相對就冇咁大驚喜。另一個亮點竟然係啤酒，估唔到佢哋唔係用玻璃杯，而係用傳統的戰鬥碗，令到大家都突然燃點起豪飲啤酒的「戰鬥慾」！