Video
Read full review
2016-08-17
5517 views
因為機緣之下認識咗店主，同佢傾飲食、做菜、整甜品都好啱咀形，所以，佢久唔久出咗新產品都會話聲我知，遇正啱心水嘅出品都會過嚟支持吓，俾俾個人愚見。其實，店內已有賣好幾款甜點，如心太軟、窩夫，聽佢講想專攻多少少蛋糕類甜點，最近就新出咗幾款卷蛋 ，所以，同親友過嚟試試。本應嚟淨食甜點當下午茶都喺唔錯嘅安排，不過，索性早少少，加點輕食當正餐。近門口位設置兩組藍色絲絨大梳化位，喺迤住飲嘢、傾偈嘅最佳位置，又可以細看街上百態。不過，食嘢就有少少唔太就手，所以，我就鍾意坐餐枱位。一派輕鬆咖啡室格局，讓人感覺悠閒。講到啲餐枱位，最理想喺最入面嗰一排，因為，相對少人來人往，騷擾都變得少啲。翻一翻餐牌，印象比以前多嘢咗，小食、沙律、全日早餐、漢堡、特色麵包、肉類、意粉、意大利飯、窩夫、甜品及各款飲品，故此，都影出嚟俾大家有個參考。就連平時晌韓式炸雞店一定見到嘅Somersby特飲，竟然晌度都搵到。 蜂蜜牛油果香蕉奇異果特飲 $52 入口感覺幾甜潤清新，咁多款生果，就肯定夠晒健康，味道上，以香蕉味較為特出。打得好綿滑，唔會飲到半粒碎冰，可能加入牛油果關係，又配上香蕉，與其叫沙冰，其實飲落口感真喺有啲
本應嚟淨食甜點當下午茶都喺唔錯嘅安排，不過，索性早少少，加點輕食當正餐。近門口位設置兩組藍色絲絨大梳化位，喺迤住飲嘢、傾偈嘅最佳位置，又可以細看街上百態。
不過，食嘢就有少少唔太就手，所以，我就鍾意坐餐枱位。一派輕鬆咖啡室格局，讓人感覺悠閒。
講到啲餐枱位，最理想喺最入面嗰一排，因為，相對少人來人往，騷擾都變得少啲。
翻一翻餐牌，印象比以前多嘢咗，小食、沙律、全日早餐、漢堡、特色麵包、肉類、意粉、意大利飯、窩夫、甜品及各款飲品，故此，都影出嚟俾大家有個參考。
就連平時晌韓式炸雞店一定見到嘅Somersby特飲，竟然晌度都搵到。
蜂蜜牛油果香蕉奇異果特飲 $52 入口感覺幾甜潤清新，咁多款生果，就肯定夠晒健康，味道上，以香蕉味較為特出。打得好綿滑，唔會飲到半粒碎冰，可能加入牛油果關係，又配上香蕉，與其叫沙冰，其實飲落口感真喺有啲似奶昔。
藍莓乳酪沙冰 $43 雖然無親身試，但親友話唔錯，藍莓味好強，加入乳酪，帶點酸酸爽爽，不過，沙冰面嘅忌廉雖然令賣相好睇好多，但可以唧番少啲感覺就無咁肥，心理上好過啲。
鮮奶咖啡 $33 依度啲鮮奶咖啡真喺唔使多講多介紹，水準由賣相，到沖泡嘅技巧，以及入口嘅口感，都喺高質素嘅出品。
焗芝士煙肉大啡菇水煮蛋配薯條 $75 輕食點咗兩款店方推介，先試試個大啡菇配水煮蛋，件大啡菇厚肉而充滿菇汁，襯埋芝士同煙肉，令味道更香。不過，要挑剔少少，喺煙肉可以切得幼身啲，口感更好，水煮蛋亦有少少煮過火，蛋黃未有流心嘅效果，只喺仍有綿柔嘅狀態。
泰式辣母生菜包 $92 估唔到晌度都有啲泰式嘢出現，不過，生菜用上長形嘅羅馬生菜，先搽上泰式酸辣醬，再放上大量豬肉碎，入口非常惹味，生菜極為爽脆。個人嚟講，覺得加多少少白菌碎落豬肉度，口感更有唔同層次。
講明有新嘅產品「卷蛋」推出，飯後甜點就梗要試啦，不過，新出嘅4款卷蛋，其中兩款賣晒，所以，我哋又加多一件芝士蛋糕。
宇治抹茶卷蛋 $33一身墨綠一睇就知喺宇治抹茶，佢哋所做嘅卷蛋有別平常晌連鎖餅店見到嗰啲，中間嘅忌廉餡心特別多，佔滿卷蛋嘅中心位。而賣相，件宇治抹茶卷蛋做得算唔錯，面面仲加咗一層唧花及撒上抹茶粉，入口啲抹茶忌廉好幼滑，充滿抹茶嘅甘味，但喺抹茶蛋糕底就失望少少，入口較為乾身。
明治3.6牛乳卷蛋 $36 相反，件牛乳卷蛋賣相就差少少，以竹碳做嘅乳牛斑紋未夠平滑，但味道幾掂，牛乳蛋糕底做得軟綿清香，中間嘅芝士忌廉餡濃郁且軟滑，正！
法式忌廉芝士蛋糕 $42 外觀做得有水準，而做法有啲似紐約芝士餅，但喺就無用消化餅底，而喺直接原個芝士焗，所以，可以見到餅底跟芝士餡喺連埋一齊，而啲芝士餡極之香濃，挺實又唔會好死；面層嘅酸忌廉明顯喺加咗檸檬汁，所以，嗒落酸香且帶有清新嘅檸檬味，亦可以平衡吓芝士嘅濃味 。
店家仲搞咗個晌FB嘅美食相片分享活動，每個月選出頭、二、三獎，獎品喺現金券$300、$200、$100 ，橫掂都有影，就梗喺參加搏吓啦，望中咗$300免費食多餐 ！
雖然，今次嘅目標喺試卷蛋，但兩款輕食都唔錯，不過，有啲瑕疵位，有改善空間。而新出品方面，對比兩件卷蛋，發覺外型唔一致，即喺捲起餡心時嘅份量，以至收尾部份，以及海綿蛋糕嘅綿密同鬆軟度，可見水準嘅穩定性可能喺較弱嘅一環。故此，相信再改善吓、調校吓，捲土重來嘅卷蛋一定做得更有水準 ！
Post
