辛安東元祖奶奶雞 (Closed)

之前朋友食過奶奶雞，佢話7點己經滿曬人，所以今次專登6點過左去荃灣食，結果真係唔洗排隊好鐘意佢地既裝修，好多顏色好鮮豔，食野都開心D！飲品方面簡左梨味（HK＄38)同柚子味（HK＄38)，多數食韓國野都係飲哩D，無乜特別！膠原蛋白沙律（HK＄68) D菜夠新鮮又爽口，不過沙律汁太多有D咸！紫菜飯卷（HK＄48)飯粒夠黏，咬落去唔易散開，而配料有青瓜、玉子、紅蘿蔔同埋火腿 ，可以加沙律醬食，但我覺得唔加都夠味！芝士咖哩年糕($58)咖哩汁香濃，仲可以拉到芝士絲，不過只有面層有芝士，另外，裡面有好多魚糕，不過年糕煮得太耐變得好冧，無左煙煙韌韌既口感！最後，食奶奶雞緊係要簡返最原汁原味既辛安東元祖奶奶雞（hk$148半隻，hk$228一隻) 兩個女仔驚死唔夠食，簡左一隻奶奶雞，最後係食唔曬因為勁大份！另外，有得簡無辛、小辛、中辛同埋激辛，其實感覺似食緊雞煲！而面層放左多蔥，除左有雞外，仲有好足料既水晶粉，係燉既過程吸曬醬油味，睇個色水就知勁入味！雖然雞肉算嫩滑，但身型偏瘦較多骨！