臺茶•薈 (Closed)

日日返屋企都會經過天后，最近發現開左間新嘅台式餐廳叫做臺茶·薈，好似裝修得唔錯，有小清新嘅感覺，不妨一試，睇下質素如何先！入到去，侍應好熱情招待！今時今日有咁嘅服務態度已少之又少！逢上水同餐牌後，好快就幫我落好單！先奉上兩杯飲品，驟眼望落去好相似，但其實左邊係芒果多多，右邊係芒果綠茶，兩杯芒果味都好香好突出！再叫左個臺茶薈炒米粉，原來超多配料，有隻太陽蛋，手撕雞，龍蝦丸，肉鬆等等，好豐富！炒完米粉仲有少少濕潤，又夠味！另外仲有個魯肉飯，同我平時食開嘅唔太似，除左有啲魯肉醬之外，仲跟左啲原塊魯肉，好特別！而且夠曬淋，入曬味！小食方面，叫左個炸物拼盤，花枝丸最好味，因為入面真係有粒粒花枝，灑上到味粉夠惹味！鹽酥雞細細粒，但入面仲係好滑！香腸同椒鹽雞翼就唔太突出！仲有個地瓜薯條好香地瓜味，不過炸完略微焦，外觀唔太討好！最令我失望嘅係我喺門口見到有仙草芋圓，到我食曬野準備叫甜品時，侍應竟然話今日芋圓未準備好，意思啫係冇得食！我當堂極為傷心，唯有下次再為芋圓而黎喇！