新仙清湯腩 (Closed)

新仙清湯腩，在我心目中是一間很有水準的店，我想說的是砵蘭街的那家店，排名至少會在大利前面。某天經過灣仔，得知其在集成開了分店，於是有兩次在附近開完會，獨自前來偷歡。新店子，光猛企理，東西齊齊整整，環境當然比砵蘭街店好得多。隨便找個卡位坐底，柯打好嘢食，繼續塞著耳仔自得其樂。清湯腩河，可選肥啲、半肥瘦或瘦啲，我條件反射地說要肥的。阿姐話好肥架喎！唉，唔緊要喇，俾我放縱下喇，唔該。牛腩果然是幾肥，而肥的部份自然甘香，瘦的位置也不韌，是好東西。蘿蔔亦做得好，清甜、腍身又無渣，我喜歡。好記得總店的奶油豬係十萬個好食，基本上可以為佢而來，因此又來一份。可惜，這次卻有點令人失望，雖然煉奶成份唔少，加起牛油香甜美，但最大問題係唔夠脆，沒有以前的好。想不到呢度生意都幾好，晚上人客漸多，我都唔好阻住地球轉，快趣飲埋杯檸茶便離開。