三希樓 (Closed)

係朋友既浸淫下，貌似可以越來越辣，今次又膽粗粗跟隊去食川菜，仲係聽說係半山開到黎銅鑼灣既餐廳。川菜必叫水煮魚今次都唔例外。未食之前店員建議先起辣椒以免浸得耐會太辣，我當然同意😂。魚肉厚厚，麻香入晒肉，但仲非常嫩滑，煮得岩岩好！平時食到尾太辣既薯粉今次我都食到晒，太好！建議好辣既朋友可以浸耐d辣椒先。😝四川擔擔麵都係我必食之選，麵質有d稔，比其他餐廳偏辣，但好香。個人意見多d花生味會更好！蛋黃南瓜超搶fo! 非常濃郁既咸蛋黃沙包住唔太稔又唔太硬煮得岩岩好既超甜南瓜，好驚喜！食得多有d膩但會忍唔住繼續食。椒鹽排骨架買相好靚，逐舊疊起好有心思。肉唔會好乾，加埋d葱食唔會好咸，幾好。最後既甜品係流沙包，本身係川菜館有流沙包已經好意外，而佢熱騰騰咁攞出黎更加冇得輸。