黑鉄屋 (Closed)

先排被人問點解去日本可以成日食拉麵，但係香港又唔食？其實我都唔知點解，係香港總係冇動力去食，尤其夏天。呢次因為要夜晚去灣仔睇show，又唔想食咁飽，諗起灣仔開左好幾間拉麵店都未試過，所以上網search下，見到黑鉄屋的叉燒賣相非常誘人，就決定試試。佢基本上有兩種湯底：豚骨、雞骨，再加上醬油調味。我地叫的金兵衛、銅兵衛（各$88）都屬於豚骨口味，分別在於金兵衛加左辣肉醬。豚骨湯底唔係走濃厚路線，飲落自然舒服得多，不過差在唔夠熱，溫溫吞吞咁，要扣分。每碗有兩片厚薄適中叉燒，經輕輕烤過的叉燒色澤誘人，香氣十足，豬皮位置略帶煙韌，瘦肉部分亦好腍，非常好食。麵條用上幼直款式，類似一蘭，掛湯能力一般，但勝在爽滑。溏心蛋唔駛加錢已經食到，算難得，流心程度亦佳。金兵衛雖然加左辣肉醬，但辣度只屬一般，喜歡濃味者不妨一試。呢度除左各款麵食，仲有串燒、餃子、蒲燒鰻魚、烤魚等小吃供應，啱晒心多多的香港人，我嘛，還是比較喜歡專心一致的店，就好似日本嘅咁。值得去指數：