津津食店 (Closed)

聽說發哥喜歡星期日喺大嶼山行山後，會到此處食番茄蟹檬。民間特首嘅喜好喎，梗係吸引到好多人慕名而來。我第一次嚟津津食店唔係星期六，所以食唔到蟹檬轉戰茄腩檬。番茄味濃，牛腩幾鬆軟，檬粉就比較碎。我幾欣賞個湯底，無味精，最後會想飲埋個湯。一碗粉四十幾蚊，無包嘢飲，要另叫。不過感受梅窩街坊融洽嘅氣氛，都值得嘅！我第二次就選擇了星期日去，因為希望試吓鼎鼎大名嘅番茄蟹檬。我滿心觀喜餐牌都唔睇就叫餐，然後等咗約十分鐘，一碗蟹檬就熱辣辣喺我面前。第一眼見到個蟹蓋，係我想像中嘅畫面。我再翻一翻碗中的粉，有幾粒肉丸，有點芽菜，蟹呢？蟹呢？蟹呢？最後喺碗底發現有一舊蟹肉附帶三隻蟹腳，就係咁樣。味道方面其實幾好，湯底都很有蟹味，而嗰一舊蟹肉，就普通啦，肉質也不算太新鮮。講真，真有點失望。碗粉叫蟹檬，但蟹肉真係少之有少，我甚至覺得叫番茄肉丸檬都不為過。所以如果對蟹檬有太大希望，你是注定要失望，反而我覺得茄腩檬比較實際。