麻神麻辣火鍋 (Closed)

黎到銅鑼灣呢頭，我地幾個人行到攰，又諗唔到食咩，最後就黎左打邊爐!呢間名叫麻神的火鍋店，之前未黎過，不過朋友話食過唔錯，咁就帶埋我地黎食!我地幾個人食量都麻麻，所以都唔敢叫餐，最後散叫，呢度食物都幾多款，仲有d平時好少見到gei!話麻辣湯底好正，不過又驚太辣所以叫左個鴛鴦鍋，估唔到咁樣食落又幾好，可以試兩邊唔同gei味，原來湯底唔同，食落個分別都幾大。我地叫左韭菜餃、炸魚皮、菜、魚皮餃、響鈴、油條、牛同叫左碟鹵水鵝腎，份量適中，我地食完岩岩好，都OK唔會太飽。個鹵水鵝腎食落唔錯，幾入味，而且好有口感，沾上汁食，口感層次更豐富。牛方面，肉質鮮嫩，食落有口感，同麻辣湯底一齊食更滋味，麻味濃又香!炸魚皮係我打邊爐的最愛，浸浸即食，又脆又可以帶點麻辣味，係超過癮~個油條都幾特別，平時都係食響鈴多，呢個浸一浸即食，非常索汁，好鬼正!