北京老家 (Closed)

屋企人安排黎食，地點好易搵，上到去成個環境都好似古裝劇嘅景，非常之多人。一坐低發現玻璃枱底有缸魚，設計幾好，如果驚同枱尷尬無野講可以望下缸魚，不過之後野食黎齊都擺滿哂，唔會再記得有缸野喺下面，可以專心食野。我地叫左個套餐，未睇清楚個餐牌，屋企人已經落左單，所以有幾樣都唔係好知係咩黎。首先黎嘅係粉皮，咬落軟硬適中，不過個醬食到尾都幾漏。之後有碟唔知咩肉，評唔到，因為辣到我食唔到。然後有必叫嘅片皮鴨，鴨肉肥瘦適中，個人鍾意食甜醬加白色塊皮多過舊肉。孜然羊肉，好香，但羊肉好碎，偏辣。最好味係個柚子汁炸魚，雖然條魚好大，但食落又唔鞋喎，同柚子汁好夾。最後有個炒魚麵，外型同口感都同銀針粉好似，但佢係魚麵，所以食得多又係好漏，但味道ok。甜品叫左拔絲士多啤梨，個糖醬超甜，食一粒已經好夠。