Video
Read full review
2014-05-08
5664 views
小肥長輩眾多，居住o既地點遍佈全港九新界，幸好大家都鍾意食，所以好多時都會相約出黎聚餐聯誼，不過餐廳o既選擇都係以港島區為主。長輩當中有位Uncle W，出名愛犬，多年前為咗要給予其犬隻更多活動空間，以及空氣更加清新o既環境，就決定搬入新界住。Uncle W屬半退休人仕，閒時除咗陪狗狗，就最愛周圍覓食，而且特別留意可以攜帶寵物o既食肆。有一次飯局，講起新界唔知有乜好野食時，佢第一間就諗起大埔三門仔o既「皇朝漁苑」，好客o既Uncle F隨即就話要請客，叫大家擇日組團入大埔試食 。眾所周知，小肥甚少過九龍用膳，新界區更加係一次都未去過，唔係誇張，今次係小弟咁大個仔第一次去大埔 ！聽到「大埔」兩個字都已經覺得好遠，點知聽朋友講，由港島區出發，前往三門仔，乘坐任何公共交通工具都要轉幾次車，心諗「皇朝漁苑」不但遠，地點都幾隔涉吓 （環境分被扣之原因）；有私家車當然係最方便啦，除咗可以直達目的地之外，仲可以泊架車喺餐館個私家停車場入面。Uncle F請客，細姪唯一可以幫忙o既就係充當其中一位柴可夫，接送部份賓客 ；我地就職人仕一組，放工由中環出發，經紅磡隧道，以安全車速，約一個鐘頭先入到
聽到「大埔」兩個字都已經覺得好遠，點知聽朋友講，由港島區出發，前往三門仔，乘坐任何公共交通工具都要轉幾次車，心諗「皇朝漁苑」不但遠，地點都幾隔涉吓 （環境分被扣之原因）；有私家車當然係最方便啦，除咗可以直達目的地之外，仲可以泊架車喺餐館個私家停車場入面。
Uncle F請客，細姪唯一可以幫忙o既就係充當其中一位柴可夫，接送部份賓客 ；我地就職人仕一組，放工由中環出發，經紅磡隧道，以安全車速，約一個鐘頭先入到去三門仔。
「皇朝漁苑」個招牌及海鮮魚缸好搶眼，室內亦不失禮，雖然只得一層，但面積超廣，大廳室內及室外散座各可容納最少十圍。室內大廳光猛闊落，弧形o既天花板設計有時代感得黎又不失優雅，順眼舒適；室外燈光就較柔和，有海風吹過黎，感覺好寫意，傍晚更可欣賞日落，最啱小情侶，坐室外座位之食客可隨意攜帶寵物，不過大家要小心蚊蟲 （衛生分被扣之原因）。
私人房間則有四間，大少不一，每間都好得體，其中以高級廂房最為豪華，配套包括酒櫃、長梳化、獨立煮食爐、私人洗手間、及卡拉OK，估計坐十六人都冇問題。
不得不提o既就係女仕們o既洗手間，全為獨立房間。
可能係閒日關係啦，當晚客人不多，除咗我地室外一圍，就只有室內一圍及室外兩張散枱，小肥影相都唔洗太避忌，服務生們亦好健談，有問必答，隨傳隨到。態度和藹親切o既姐姐仔們非常細心體貼，不時為食客換上乾淨o既餐具外，仲會主動分餸，同協助長輩們夾餸。既然服務咁好，為何服務分會被扣除一分呢？！此乃因為落單時，哥仔姐仔未有清楚提及到各款海鮮之價格及份量，XO仔有感被屈之嫌 ，故此以一分服務分作為警惕。事關主人家Uncle F都係第一次幫襯皇朝漁苑，所以未有預先寫好菜單，除咗Uncle W訂咗隻乳豬之外，餸菜全為賓客們即場經伙計介紹而點。
即叫即燒乳豬（$880）：有相為証，絕無吹噓，大師傅真係喺我地面前即燒乳豬，保證新鮮滾熱辣 。乳豬皮脆鬆化，肉質香嫩，唔點醬食，原汁原味一樣咁正！同桌o既美女廚神最愛食豬頭，食後更大讚「對豬耳好似薯片咁脆」。
陳皮蒸南非鮑（$128/隻）：珠女（姐姐仔名為「掌珠」；大肥反應真係快，一聽到個名就斷定係珠女爸爸改，意思為父親之「掌上明珠」，逗得大家哈哈大笑！ ）主動幫我地分，服務非常周到。雖然鮑魚邊軟腍，但係個心就較實同硬，年長o既客人因牙力不足，大家都不甚滿意 。
瀨尿蝦蝦仁煎蛋（$168）：大肥爸爸落單時叫滑蛋蝦仁，可惜黎咗煎蛋，所以上餸時有少少失望。雖然蝦仁爽，但係煎蛋又老又嚡又乾，而且所謂瀨尿蝦亦只有唔多睇到o既瀨尿蝦膏，種種理由下，大中小三肥狠批「貨不對辦」 。
兩位經理分別推介「三吃亞拉斯加蟹」，咁啱除咗XO仔一個有敏感之外，主人家及上賓們同為「蟹痴」，所以大家都話想試。起初經理話比隻九斤重o既比我地 ！！！大家聽到都嚇咗一跳，當然係連聲說不啦，緊住佢先話有隻六斤半，一圍啱啱好wor。我地一行十一人，除咗小肥，哥哥同美女廚神之外，全為年過花甲o既長者，經理居然提意比隻九斤重o既蟹比我地，小肥頓時心覺不妙 ，但礙於輩份低微，未有即時提出有被屈之感。亞拉斯加蟹之清蒸蟹腳（$4,780/六斤半 ）：皇朝漁苑好有文化及衛生意識，食客除咗每人有一對公筷及刀叉外，食蟹前亦會為各人派發剪刀及手套 。小肥對蟹敏感，無份食，唯有佢地食時我記錄，綜合各人意見。Auntie們大多認為蟹肉鮮甜，唔需要點醋食都好正，主人家Uncle F就略嫌蟹肉唔夠彈牙。美女廚神評語較為精細，故此要作出引述：「蟹腳上半截蒸老咗少少；下半截就完全唔同，肉質超嫩滑，正好多！」
亞拉斯加蟹之上湯焗蟹身：據Uncle F所評，清蒸蟹腳比上湯焗蟹身美味，因後者肉質除咗較嚡外，所用o既醬汁味道太濃，蓋過哂隻蟹本身o既鮮甜味 。
亞拉斯加蟹之蟹蓋焗飯：蟹蓋冇膏又冇肉，細佬個人覺得用黎焗飯作第三吃其實有少少搵笨囉。Uncle W話蟹蓋焗飯「太蟹」，而且較乾，唔係佢杯茶wor！
蒜蓉粉絲蒸蟶子皇（$55）：個蒜汁好野味，但係粉絲偏硬，蟶子皇本身有少少腥，質感亦帶韌，小肥對此有所保留。
清蒸花英斑（$1,508）：大肥話蒸魚之中蒸斑係最難控制，依條花英斑本身好靚，加上師傅蒸得恰到好處，魚肉鮮甜嫩滑，掂呀 ！唯一問題係我地當日喺室外座位食，所以條魚轉咗一個圈就涷哂 。
皇朝香酥鴨（$190/半隻）：客人可自選用生菜或薄餅皮包住黎食。鴨肉本身乾，亦唔夠香口，不過用薄餅皮加海鮮醬夾住黎食效果就好好多，可惜始終唔夠肉汁，不吃也吧。
薑汁芥蘭（$160）：菜皇Auntie Y話啲芥蘭勁脆，不過就「唔夠薑」。
勝瓜肉碎浸魚鰾（$376）：勝瓜脆口，魚鰾爽得黎味道就帶腥。
窩燒鮑汁鱆魚雞粒炒飯（$108）：炒飯濕濕地，用窩上，所以好夠熱，而且一啲都唔油唔乾。小肥最欣賞啲雞粒嫩滑，飯味帶甜；嘻嘻，眼見同桌o既長輩們已經食唔落飯，自己添完兩碗後仲自薦打包返公司做午餐添 ！
拔絲香蕉（$256/八件）：拔絲香蕉係XO仔喺openrice度睇返黎，大家未叫海鮮前已經先落單。食評們真係冇介紹錯，拔絲香蕉無論係其震撼o既外表，亦或係其美味程度都可以話係當日晚飯之高潮 ！金黃色o既拔絲香蕉一上枱，足已令全枱人嘩嘩大叫，其燦爛奪目o既外形當然更謀殺咗不少菲林啦！據忠師傅所講，金黃色o既糖醬係拉出黎o既，聖誕時段佢地會刻意用白色，務求拉出一個白色聖誕效果，如果客人要求，更可拉出金銀色，即一半白加一半金。拔絲香蕉不但睇得，仲好食得添！薄薄o既糖醬幼絲香脆得黎唔會過甜，捲住軟腍o既香蕉簡直係滋味無窮，必吃之選也 ！
其他收費：兩碟泡菜：$20/碟
茗茶：$15/位
兩碟XO醬：$18/碟
加一服務費：$1,168
全晚令小肥最震驚就係睇到張單o既時後，因為個心一直都係估六、七千蚊左右，真係從來冇諗過會過萬 ，仲要係差不多萬三，即係多咗成陪 ！可能係錯覺啦，成日以為喺新界食野，尤其係海鮮，一定抵食過喺市區食，今次Uncle F又幫細佬交咗學費，上咗一堂啦！皇朝漁苑雖然舒適闊落，服務高質，但地點偏遠，所以除非食物水準超凡，唔係真係好難會令食客越區光顧。客觀評論，咁多味海鮮中，只有條花英斑蒸得較為出色，其他菜餚中就以乳豬及鱆魚雞粒炒飯較為突出，雖則大家都深深比金光燦爛o既拔絲香蕉有所迷倒，但因食物平均水平有所參差，價格昂貴，物不超值，故此要肥肥家族勞師動眾再次入大埔，機會可以話係好微 ！
Post
