飯丸屋 (D2 Place TWO) (Closed)

約左朋友去D2 place行街，佢話肚餓但趕住走，唔夠時間坐低慢慢食。經過有間叫飯丸屋嘅鋪頭，主sell 飯團。鋪頭旁邊有少少位可以坐低或者立食，拎走都得，任君選擇。朋友喺度買個飯團邊行邊食就啱曬啦！同朋友分別嗌左兩個飯團：日式炸雞飯團同炸蝦天婦羅飯團。兩個飯團都加左$13升級做激安套餐，配飲品或小食。我同朋友都揀左配飲品，分別嗌左日式抹茶豆漿同埋蜂蜜檸檬。豆漿加抹茶crossover幾特別👍🏻我飲左蜂蜜檸檬，少少甜，甜度剛好，感覺清新。所有飯團即叫即製，食嘅時候重熱架！兩個飯團都配煎午餐肉同玉子燒。煎午餐肉較薄身，煎得香脆。飯團最外層用紫菜包住，紫菜夠乾身唔會過腍，厚薄適中唔易穿。日式炸雞飯團炸雞落左蜂蜜芥末醬，甜甜地。炸蝦天婦羅飯團炸蝦好大條，配上沙律醬入口唔會dry。飯團整到好似漢堡包咁，夾左好多食材，食起黎好方便，用飯取代包，包你夠曬飽！下次想食漢堡包嘅時候可以黎飯丸屋買個飯團，健康又飽肚。👍🏻