蝦棧 (Moved) New Location

今日同朋友行完花墟，諗住係附近搵食，行行吓見到有間叫蝦棧嘅餐廳，望吓餐牌，估應該係台灣嘢黎，價錢唔算太貴，又見到入面都唔少客咁，所以朋友同我就決定試試。餐廳睇落唔算大，有啲似小店feel，未夠七點都已經坐滿哂人，walk in 嘅朋友要留意一吓。坐低即睇睇餐牌有咩好嘢，因為知道蝦煲係招牌菜之一，所以我哋首先點咗個黃金蝦煲，之後再點咗溏心蛋，醉雞，一口豆腐，同油麥菜。朋友聞到隔離枱個撈麵有好香嘅麻油味，所以再加咗單。雖然係小店，但上菜速度都ok，等咗一陣，頭盤就黎啦，先食溏心蛋，醃得好入味，可以話係滿分之作，一碟四件兩個人啱啱好，多一個人都可能會打交。之後試醉雞，成碟切片去骨，賣相似壽司咁款，食落好有花雕酒味，但又不至太濃，好啱女仕口味。跟住到一口豆腐，上枱第一眼冇乜特別，色澤比想像中較淺黃，但放入口一刻就好唔同，熱辣辣之餘，仲外脆內軟，雖然係油炸，但食落唔覺油膩，抵讚。食到差唔多，主菜黎啦！黃金蝦煲，一睇就知係邪惡之物，好好味，一煲有八隻蝦，兩個人分都好夠，其實黃金蝦只係其中一種煮法，我見餐牌有好多口味可以揀，所以應該總有一款係你杯茶。話明煲上，當然係熱辣辣啦，食嘅時候真係要小心辣嘴。