饞。台式食堂 (如心廣場二期)

Open Now

Now Closed

颱風將近，放工嗱嗱聲買外賣返屋企醫肚，揀咗位於如心廣場嘅呢間台灣菜，剛開張嘅時候食過，印象唔錯，而家外賣自取仲有九折優惠。餐廳嘅抗疫菜單選擇雖然唔算多，但台灣菜中最常見嘅鹽水雞、藥膳排骨、鹽酥雞、紅燒牛腩同滷肉飯之類都應有盡有，而且小食同飲品選擇眾多，價錢亦算合理。外賣盒分成上下兩層，上層係白飯，下層係餸菜，唔怕湯汁喺返屋企途中會倒瀉，非常貼心。蓬萊米煮成嘅飯夠香而且有咬口，灑上少量黑芝麻更加香口；主角紅燒燉牛腩夠軟腍入味，配菜方面有紅蘿蔔同白蘿蔔。藥膳排骨真材實料，驟眼睇都有杞子、紅棗、圓肉同黨蔘，排骨肥瘦適中，藥材味道香得嚟唔會太重，感覺滋補。炸物拼盤有齊花枝丸、甜不辣同地瓜條，份量兩個人分享剛剛好。甜不辣嘅口感有啲似魚餅，大大件，爽口彈牙。花枝丸口感同樣彈牙，夾雜住少量花枝粒，令口感更豐富。整體嚟講餐廳嘅外賣便當質素可以，價錢亦合理，如果份量再添啲就更加好，疫情之下能夠享用到簡單嘅台灣風味，而且乾淨衛生，即使係外賣便當，都已經係一份福氣。