西門町台灣麵食 (Closed)

如果突然想念台灣美食，但又無錢無時間即刻飛番一轉台灣既話，西門町可能係你一個好選擇。旺角出名多野食，但真心覺得好食既真係黎黎去去都係個幾間。隱藏係女人街接近尾段，要搵的話其實唔難，搭地鐵建議係油麻地出，去到登打士街（好多野食個條街），見到ok轉入去，行一陣就會見到呢一間小店。話明小店，地方梗係唔會大得去邊，一眼睇曬，而且夜晚都幾多人幫襯，如果想食真係要早少少去，唔係既話就要忍受企係條狹窄、好多行人、悶熱既巷仔慢慢等位。講返食物，今次叫左個二人餐（$198)黎食。鐘意食酸酸辣辣野食既你就岩喇！呢個酸辣粉皮好開胃，味道偏酸，微辣，但略嫌碎左少少，每次挾起得細細塊，粉皮可以再滑少少。呢個係我最鍾意既擔擔麵，湯底有好濃既花生味，麵既硬度適中：）肉臊飯味道一般，醬汁尚算足夠，肉臊咸度適中，不過不失。醉雞既酒味無之前食咁重，肉唔太肥但唔滑偏淋。芒果沙律鳳尾蝦炸得好脆，食落去唔太油膩，但真係食唔出有芒果味。叫左兩杯玉露，味道唔錯，岩曬依家呢d熱辣辣既天氣飲！套餐會送所謂甜品，啫喱兩個，無咩特別。整體來説，食物味道不錯，上菜速度算快，除左地方較逼之外，係一個懷緬台灣美食既好地方。