越南米紙 (Closed)

返工前係九龍灣遊蕩，係平時搭車嘅小巴站對面，見到有一間製修新穎嘅越南餐廳，光鮮吸引。餐牌上選擇都幾多，午市又有學生優惠等等。而且餐廳位置闊落，都坐得幾舒服。叫左一碟順化三寶撈檬($57)，貪佢有齊香茅雞翼、豬扒同扎肉。無影到有幾大碟，但一上枱，撈檬份量驚人，直頭可以用一桶黎形容，同張相完全係兩回事。女仔黎講，兩個人叫呢個撈檬，再加一碟小食已經絕對夠飽。厚切香茅豬扒大大塊，雞翼炸得香脆可口，扎肉口感結實彈牙。檬粉倒入甜酸汁，惹味開胃。香蔥、花生碎都好多，非常香口，獨欠乾蒜，如果加埋就完美。飲品選擇都有好多，沙冰都有十多款，而啲名仲好新穎，什至連近期大熱嘅牛油果沙冰都有。黎到食越南菜，又點少得滴漏咖啡($26/熱；$28/凍)，跟餐更加有六折。 侍應貼心提醒熱咖啡中有煉奶，要攪勻先好飲用。越南咖啡比一般咖啡味道更苦更濃，所以加入煉奶，但亦正正成為大家愛好嘅原因。九龍灣有太多美食，連比較遠離地鐵站嘅安基苑商場附近，近年都有唔少新餐廳。大家只要行遠多少少，就可以發掘更多更美味又廉價嘅食物。