一素食譜

Open Now

Now Closed

甚少踏足觀塘, 如果唔係約咗朋友去附近睇戲, 其實真係唔會去。早咗去, 周圍逛一下, 順便食lunch。最近食肉多, 決定食一下素。誤打誤撞, 行到去東廣場, 見到呢間, 價錢都合理, 就坐低咗。叫咗車仔麵 --- 地瓜麵 + 秋葵 + 雲耳 + 冬菇 + 珍珠貢丸 + 鹵水豆乾, 生菜係送嘅。地瓜麵好幼, 幼到似 angel hair, 好滑, 但冇乜味, 好彩湯底夠味, 唔太鹹, 食得出蔬菜甜味, 配埋地瓜麵啱啱好！秋葵 同 生菜都好新鮮, 翠綠嘅！雲耳 同 冬菇有燜過, 好入味, 唔似得有D冇誠意嘅餐廳, 求其整熟、淡荗荗.......... 雲耳係靚嘢, 爽口嘅, 形狀有D似貓耳朵。是日例湯係老黃瓜赤小豆, 我至愛！足料, 我連渣都食埋, 哈哈！見到素蛋撻, 忍唔住叫埋嚟試下。店員會幫你加熱, 雖然係番熱, 又冇用蛋或奶, 但出乎意料地味道ok (雖然個樣麻麻地, 哈哈)。整體水準不俗, 價錢亦公道, 好有heart嘅小店 (肯定冇用味精! 因為我食完唔口渴, 哈哈), 唔錯！ 下次再去觀塘, 會再去幫襯。