桃園眷村 (Closed)

熊妹病病地，決定今日逃學，同熊大周圍hea下，無精神返學但有精神周圍走，哈哈。熊妹病病地食唔得太油膩，知道朗豪坊新開左間食台灣粢飯同豆漿，應該清清地食得過。位置係朗豪坊美食廣場4樓個層，以前mos burger個位。 自己排隊點餐形式，點餐後有個電子call機，食物準備好會著燈呼喚食客去攞餐，即其實係類似快餐店咁。熊大不嬲都喜歡粢飯，叫左個肉鬆青瓜飯團，同凍豆漿。熊大話味道係可以的，有啲似將台灣魯肉飯變成飯團咁食，入面确實有少少滷蛋，幾特別的。凍豆漿無跟餐架，單買$22，味道就係一般豆漿味道，貴左啲喇。燒餅係呢度的招牌菜，熊妹就揀左豬柳蛋燒餅同咸豆花。 嘩，個燒餅係真心難食，熊妹好少會講野難食，但個燒餅真係太惡劣。首先，燒餅本身好乾，一啲醬汁都無，連埋豬柳同蛋都係無汁，乾上加乾，豬柳又細塊，蛋又無香味，成件事乾吞真係好難為喉嚨。唔知道出名在何方?咸豆花似飲咸豆花湯咁，有啲辣辣的炸菜，油炸鬼，紫菜絲，味道都可以的，但索價$32，材料全部都內一啲成本平價的配料，真係賺到笑。好在係朗豪坊地方開揚，環境都坐得舒服，但食物資素黎講熊大同熊妹一定唔會再黎嚕。