點點甜 (Closed)

唔知你哋同另一半嘅口味夾唔夾嘅呢？其實同A姐一齊咗咁耐，我好想講佢真係好易養，因為我哋有好相似嘅口味，我哋都好鍾意打邊爐同食車仔麵，而我哋都唔好甜品架，梗係啦，望住對方都夠晒甜啦！不過，今日例外啲，因為我哋喺旺角食完一間好多味精嘅餐廳之後，真係口喝到暈，結果食甜品就成為了我哋今晚嘅特備節目。之但係，太甜我哋又好驚，所以見到呢間鋪頭真係啱晒我哋心水，佢叫點點甜，姐係唔會好甜啦。香芒明珠食甜品又點少得芒果呢？而且叫芒果真係好保險架，你睇吓周街有幾多主打芒果嘅甜品舖就知啦！勁口喝嘅我哋，見到呢個芒果汁底，已經急不及待飲幾啖喇，好濃香嘅芒果味，又夠凍，仲有好多芒果粒，真係好fresh又解喝呀！不過，講真，呢個甜品嘅製作難道唔高，好彩用料都無偷工減料，除咗芒果汁，仲有芒果布甸、椰果、白丸子同雪糕，好足料呀！宇治森林一個選擇相對較甜嘅芒果，另一個就選擇相對較苦嘅抹茶啦！抹茶雪糕夠滑，茶味又濃又回甘，加埋少甜嘅紅豆蓉，成件事中知晒！仲有好軟滑又爽嘅抹茶啫喱、煙韌嘅白玉、脆口嘅粟米片同最驚喜嘅豆腐花，估唔到豆腐花會到呢杯抹茶咁match架！