L.D.K. by Ufufu Café (新都會廣場)

Open Now

Now Closed

女女三姊妹上完畫劇三個family想食個午餐，就一行八人去新都會搵食。經過LDK被佢餐牌吸引，我地未開鋪已急不及待於門外排隊，等到十一點半開鋪成為店內第一客人。呢間日式咖啡店內有兩本Menu，橙色果本係各式食品，主打日式咖哩、Sukiyaki壽喜燒、咖哩飯等，綠色果本係甜品Menu，主打多款抹茶甜品，非常多選擇咁吸引緊係要試下。先品評一下我個鹿兒島和牛咖哩飯，大大舊漢堡和牛的「船身」加上日本珍珠米的「帆」浸响濃濃的日式咖哩海入面，賣相吸引「揚帆出海」無難度。我喜歡呢度日式咖哩味有微辛，分量岩岩好夠汁撈飯。重點的主角鹿兒島和牛用漢堡做法，入面混入洋蔥更香口，可惜完全食唔到和牛的嫩滑同埋油脂甘香，只可以算合格。而壽喜燒贊其烏冬日式甜豉油做湯底加入薄薄生牛肉，由燒至火紅的瓦煲滾熟，仲有半生熟的蛋黃。烏冬麵爽滑，牛肉嫩滑，混入蛋黃漿令湯底更綿滑，加上壽喜燒甜味，大和日式風味「盡收脷底」。呢度的特式小食有驚喜，簡直係「化豆腐為神奇」，豆腐磚同胡麻醬味道簡直天生一對，而面頭的蝦乾令人有如置身於櫻花海中。食完已經好飽，沒有空間再品嘗其抹茶甜品，下次一定要特登再試下佢個靜崗蜜瓜招牌斑戟！