麵道 (Closed)

今日同屋企人去換身分證，順便喺嗰度食埋lunch。見到有間拉麵店，橫掂好耐冇食拉麵所以就入咗去食。見到佢有個和牛祭，好似好吸引咁，所以我同朋友就叫咗一個開運雙牛拉麵同埋特盛叉燒糖心蛋醬油豚骨拉麵。我哋再加$38叫咗個小食套餐，包飲品、一個前菜同埋一個小食。前菜方面我哋叫咗個柚子蓮藕片，佢酸酸地幾開胃，同埋佢柚子味幾濃！小食我哋叫咗個炸魚仔，佢炸得好鬆脆，同埋食落去啲魚好鬆軟簡直係外脆內軟。個和牛拉麵係用佐賀和牛，食落去入口即溶，係好幸福嘅味道，霜降均勻，牛同脂肪嘅比例恰到好處。我係咁飲佢個湯底，因為個湯真係充滿牛骨味道，喺出面好少飲到咁好飲嘅湯，真材實料。朋友嗰個叉燒拉麵都唔錯，佢係用日式細麵麵條，啲麵條充分吸收左豬骨湯嘅味道，好索汁！