聚來車仔麵

Open Now

Now Closed

今日去深水埗原先係諗住去早幾日電視介紹過嘅餐廳食佢好多人讚嘅豬潤麵，三點鐘去諗住都唔會好多人，點知去到嚇咗一驚，門囗超多人排隊，唔想嘥時間，於是就係附近覓食，只見附近多咗啲文青嘅店舖，再行過隔離街見到呢間食車仔麵嘅食店，見到有位，於是便走入去試一試。店舖只有簡單裝修，牆上放哂啲食物圖片及價錢，一目了然，原來除咗車仔麵之外，還有飯同其他小食可供選擇，望完餐牌後都係決定試佢嘅車仔麵，既然店舖招牌都係以車仔麵主打，理應不太差掛！兩個人都決定食三餸車仔麵，每碗45元，不過大家都揀唔同嘅餸，可以試多幾款。呢碗叫咗蘿蔔、豬手同牛孖筋配油麵清湯加腩汁，先試咗啖湯，湯底都清甜飲唔到有味精味，油麵份量好多，最正係蘿蔔，好甜味夠淋冇渣，牛筋都有四五件，炆得夠入味夠淋，豬手有兩件但唔算好大嚿，都炆得幾入味。呢碗就叫咗牛腩、豬大腸同豬紅配幼麵，同樣要咗清湯加腩汁，牛腩唔會話有好多肥膏，炆得都好入味，豬大腸都大大件，處理得幾好，腸內有啲肥膏但唔會有異味，夠淋又入味，至於啲豬紅就有驚喜，出面好多係唔夠味，但佢呢度啲豬紅係好夠味，非常正！